أسباب القاء النتايه البيض خارج العش

والله دى مشكله بتواجه ناس كتير جدا بس المشكله لها شقين الشق الاول
هل البيض اللى بترميه النتايه مخصب ؟ ولا غير مخصب ؟
 والشق التانى ظروف التربيه

طيب لو البيض غير مخصب ؟
ده امر طبيعى لنتايه ذكيه وفطرتها سليمه ،، لان المفروض بعد 488 ساعة القلب بتاع الفرخ يبدأ فى التكوين ،، تبدأ تشعر بنبض القلب ده اثناء رقودها على البيض
وده بيفسر ليه ممكن نلاقى بيضه واحد من كل البيض المخصب فى جانب العش او مرميه بره العش
 ده معناه ان الفرخ مات اثناء التكوين وانتهت النبضات دى والام شعرت بده ووفرت مجهودها سابت البيضه فى احد جوانب العش او رمتها بره العش ،،

طب ساعات يكون البيض مخصب وسليم ونلاقيه خارج العش
يا ترى ايه السبب ؟؟
 الاسباب كتير نذكر منها على سبيل المثال لا الحصر :

1- ممكن يكون اول شغل والنتايه مش فاهمة الدور المطلوب منها والناس بتقول عليها غشيمة وبالتعود العش اللى وراها بيكون هناك تحسن ملحوظ فى الرقاد والاحساس بالفروخ وتكوينها ونشاطها داخل البيضه ..

2- ممكن تكون انت نزلت سيلينيوم او محفز طبيعى زى الجنزبيل او احد المحفزات البيطريه زى الفيرتى فيت مثلا" ،، جعل الدكر زايف وبوظ البيض الحالى ليقوم لتزاوج جديد وفى الحاله دى الغلط من عندك انت ،، لا تلوم الا نفسك

3- ممكن النتايه خافت من شىء زى فار او بومة نزلت لهم ليلا"
 وبالتالى بتحس بالتهديد لو بقى معاها فروخ وبتضحى بالبيض حتى لا تعانى فى الدفاع عن الفروخ وتكفى وقتها بحمايه نفسها فقط لو حصل هجوم تانى لا قدر الله ..
 وتفضل هنا انها ترمى البيض نتيجه الانزعاج ده ( بيدى لا بيد عمرو )

4- ممكن قلق من كتر فتح البياضه عليهم وعدم شعور بالامان.. ودى غلطة بيقوم بيها كتير من المربيين نتيجه القلق انها تكون مش راقده او لحساب عدد البيض وخلافه وبالتالى بتحس بعدم امان ومافيش خصوصية وبترمى البيض بره العش حتى لو مخصب ..لذلك ارجو الحذر ..

5- ممكن مرهقه ومش عاوزة حاجه تجعلها قاعده فى البياضه رمت البيض لوجود مرض مش ظاهر زى البرد او الارهاق .. او اسهال والمربى مش واخد باله تفضل قاعده على البيض لحد ما تتعب وتقوم من عليه او ترميه خارج العش

6- لو النتايه كانت باضت وبعد كده جه موسم القلش وطرح الريش غالبا بتكون تعبانه ومش بتقدر ترقد على البيض وبتتركه او بتتخلص منه بالقائه خارج العش
ماهو يا تخلص القلش يا ترقد وتهتم بالفروخ بعد الفقس
 لذا ننصح الهواه الافاضل بملاحظه ان الطائر داخل قلش لا يضع له عش للتفريخ

7- نتايه سلوكيا غير مستقره ،، وده حصل معايا فى كذا نتايه
( مبدأ النتايه ،، انا بنت ناس كفايه اوى انى ابيض بس )
 فى الحاله دى بناخد منها البيض نضعه تحت زوج تانى

8- وجود حشرات داخل العش زى الفاش او النمل
وفى الحاله دى وجب التعامل مع الحشرات دى فورا"
 ويفضل تغير العش بآخر نظيف مع التأكيد على رش الطير نفسه لاحتمال وجود الفاش او النمل بجسمه

كل ما سبق اسباب تخلى الزوج يرمى البيض بالخارج وهو مخصب ..
منقول للامانة عن الاخ المحترم احمد قناوى

المزرعة لطيور الزينة

كوكتيلاسترالىفللفالوانجليزىكنارىحسونةروزفيشرزيبراجولديان فينش